မိုးကုတ်(၂)

“ချစ်သောမိုးကုတ်(၂)”

ထူးခြားသော ရိုးရာအနေအထားလေးအတိုင်း တွေ့နိုင်သေးသည့်လူမျိုးစုရွာလေးမှာ ၁၈၈၆ခုနှစ်တွင် အင်္ဂလိပ်တို့စစ်အောင်နိုင်ပြီးနောက် မိုးကုတ်ကိုသိမ်းယူသောအခါတွင် မေဂျာချားလ်ဘားနဒ်က ၄င်း၏စစ်တပ် ဖြင့် မိုးကုတ်ဧရိယာသို့ ပြောင်ဂေါင်းခေါ်သောအရပ်မှ ၀င်ရောက်ခဲ့ပြီး ဘားနဒ်ရွာဟုအမည် ပြောင်းခဲ့သော ရွာလေး ဖြစ်ပါသည်။ ထိုဘားနဒ်ရွာတွင် တိုင်းရင်းသားလူမျိုးစုများ၊ တိုင်းရင်းသားရိုးရာများကို ငါးရက်တစ်ခါ ဖြစ်ပေါ်လေ့ရှိသည့် ဈေးနေ့များ၌ ထိတွေ့လေ့လာနိုင်သလို ဒေသခံအစားအသောက်များအပြင် သဘာဝကျကျ ချက်သော ဒေသခံလီရှောအရက်ကိုလည်း ဟိုဆိုင်ဝင်သည်ဆိုင်ထွက် မြည်းစမ်းသောက်နိုင်သေးသည်။ စစ်ငွေ့စစ်ရိပ် သမ်းခဲ့ဖူးသော သမိုင်းရှိသည့် နေရာတစ်ခုဖြစ်ပါသည်။

သည်သမိုင်းတွေပြောလျှင် ကမ္ဘာကျော်ခဲ့သည့် ပတ္တမြားငမောက်ရာဇ၀င်မှာလည်း ဖျောက်ထား၍ မဖြစ်ပေ။ ပတ္တမြားငမောက်ဆက်သရန် ပျက်ကွက်ခဲ့သည့် လူတစ်စုအား ဘုရင်ကကွပ်မျက် လောင်တိုက်သွင်း ရာအရပ်ကို လောင်းစင်ဟုခေါ်သော ရွာငယ်လေးအဖြစ်တွေ့နိုင်သေးသည်။ ထိုလူတစ်စုမှ ထွက်ပြေးလာသူ ဒေါ်နန်းမှာ မိုးကုတ်အနောက်ပိုင်းကျပ်ပြင်အ၀င်ရှိ တောင်ပေါ်အရောက်ဝယ် နောက်ပြန်ကြည့်ရာ ဆွေမျိုးတို့၏ လောင်စင် တိုက်မှ မီးခိုငွေ့ငွေ့များကို မြင်ရ ရင်ကွဲနာကျကာ ကွယ်လွန်ရှာပါသည်။ အဆိုပါတောင်တော်အား ဒေါ်နန်းအရှင်မ စောင့်ရှောက်လို့ ဒေါ်နန်းကြည့်တောင်တော် အဖြစ်ထင်ရှားခဲ့သည်။

ရာဇ၀င်နှင့်ချိန်ညှိ နိုင်စရာ ထူးခြားချက်တစ်ရပ်မှာ ရတနာနှင့်နွယ်ပြီး ကွယ်လွန်ကုန်ရှာသော ဆွေမျိုးတို့ အတွက် ရင်နာရလေသူ တောင်တော်သခင်မ ဒေါ်နန်းစောင့်ရှောက်ရာ တောင်တော်တစ်ဝိုက် ရတနာကြွယ်သော ရတနာနယ်ဖြစ်ပါလျှက် ထူးခြားစွာ ရတနာမထွက်တာ ပဒေသရာဇ်ခေတ်ဆိုးကို စိတ်တော်နာလေလို့ ထင်ရဲ့။

ပတ္တမြားငမောက် အဖိုးကြွယ်ပုံနှင့်ပတ်သက်၍ French Trade Mission မှ မိုးကုတ်ဒေသတစ်ခုလုံးကို ၀ယ်ရန် မြန်မာမင်းထံကမ်းလှမ်းခဲ့သည်တွင် မြန်မာမင်း၏ကိုယ်စားလှယ်က ငမောက်ပတ္တမြားကို ရေထည့်ထား သည့် ဗန်းငယ်အတွင်း ထည့်၍ပြသသည်ဟုဆိုသည်။ ဗန်းငယ်တွင်းရှိ ရေတို့အရောင်မှာပတ္တမြား၏ အရောင် အနီသို့ ပြောင်းသွားသည်တဲ့။ သည်အခါမှ သည်လိုအဖိုးတန်ကျောက်တွေ မရေမတွက်နိုင် လောက်အောင် ထွက်နိုင်သော မိုးကုတ်ရတနာမြေကိုဝယ်ရန် ကမ္ဘာတွင်းရှိ ပိုက်ဆံအားလုံးဖြင့်ပင် မလောက်ဟု အကြောင်းပြ၍ ပြင်သစ်တို့၏ကမ်းလှမ်းချက်ကို ငြင်းခဲ့ရဖူးသည်ဟုမှတ်သားရသည်။

ရတနာဆိုတာ အဖိုးထိုက်တန်ခြင်း၊ ရှားပါးခြင်း၊ လှပတင့်တယ်ခြင်း၊ နန်းသုံးတော်ဝင် လူကြိုက်များ ခြင်းတို့ရှိမှ ရတနာမည်ပါသည်။ ပတ္တမြားငမောက်ကဲ့သို့သော အဖိုးထိုက်ရတနာတွေနှင့်ခင်းထားသော မိုးကုတ် ရတနာမြေကို အဘယ်ခရီးသွားက လွှဲချော်ပြီး သွားနိုင်စရာ အကြောင်းရှိပါမည်နည်း။

ရတနာမြေဟုခေါ်ဆိုနိုင်ခြင်း စံတစ်ခုကို ညွှန်းပြုလိုပါသေးသည်။ ကမ္ဘာတွင်ပင် ရှားမည့်အမျိုးပင်ဟု ဆိုချင်ပါသည်။ သေးသေးကွေးကွေးလေးလည်းမဟုတ်ပါ။ ကျွန်တော့်စိတ်ထင် နှစ်ပေကျော်ကျော်မြင့်၍ သုံးပေ ပတ်ပတ်လည် အကျယ်လောက်ရှိပြီး ရွှေချိန်(၁၅၀)ကျပ်သားပေါ်တွင် မိုးကုတ်ထွက်ရတနာ ပတ္တမြား၊ နီလာ၊ စိန်၊ ဂေါ်မုတ်၊ ဥဿဖယား၊ ပုလဲ၊ မိုးကုတ်မြ၊ ပြောင်ဂေါင်းစိမ်းစသော တွင်းထွက်ရတနာစစ်စစ်တို့ဖြင့် မိုးကုတ် ပန်းတိမ်ဆရာတွေက စီကာခြယ်ခတ်အလှဆင်သထားသည့် ပတ္တမြားပလ္လင်နှင့် ငွေပလ္လင်တို့ဖြစ်ပါသည်။ ပတ္တမြားပလ္လင်တော်မှ ပိုလျှံသောရတနာတို့ဖြင့် စီခြယ်ခတ်လုပ်ထားသော အောက်ခံငွေသားအလေးချိန်(၂)ပိဿာ၊ (၆၁)ကျပ်သားရှိ ငွေပလ္လင်တော်မှာလည်း ကျောက်မျက်ရတနာထည်ထည်ဝါ၀ါနှင့် မိုးကုတ်မြို့လယ်ဖော်တော်ဦး ဘုရားတွင်ထားရှိပါသည်။ ဖောင်တော်ဦးရုပ်ပွားတော် မြတ်နှစ်ဆူစံတော်မူရန်ဖြစ်သည်။

မိုးကုတ်နေသူများက ဖောင်တော်ဦးရုပ်ပွားတော်မြတ်အား ကြည်ညိုမဆုံး၍ မိမိတို့ပိုင်ရတနာများကို ရွှေသားသင်္ကန်လွှာအတွင်း ထိုးသွင်းမြှုပ်နှံပူဇော်သဖြင့် နောင်တွင်ရုပ်ပွားတော်အဆင်းသဏ္ဍန်ကို ပျက်ယွင်း စေမှာစိုးသောကြောင့် လှူဒါန်းလိုသောရတနာများကို လက်ခံသိမ်းဆည်းပြီး စုပေါင်း၍ ပလ္လင်တော်နှစ်ဆူ ပြုလုပ်လှူဒါန်းခဲ့ကြောင်းသိရပါသည်။ သည်ပလ္လင်တော်နှစ်ဆူတွင် မိုးကုတ်သားတို့ဂုဏ်ယူစရာဖြစ်သလို တစ်ခေတ်တစ်ခါက ကြွယ်ခဲ့သောခေတ်အရိပ်တွေ ထင်နေပါသည်။ နိုင်ငံတစ်ကာပြတိုက်တို့၌ ပင်ရှားလောက် သော အဖိုးတန်ပစ္စည်းမျိုးလည်းဖြစ်ပါသည်။ 

မန္တလေးမဟာမြတ်မုနိရုပ်ရှင်တော်အား နိုင်ငံအရပ်ရပ်မှ ဘာသာဝင်မျိုးစုံတို့ ကင်မရာအစုံစုံကို လက်က မချစတမ်း ရိုက်ကူးမှတ်တမ်းယူ လေ့လာနေကြသည်မှာ ဗုဒ္ဓဘာသာကို ယုံကြည်သက်ဝင်၍ မဟုတ်ပါ။ ရွှေသားတို့အိနေအောင် ရွှေစင်ရွှေလွှာတွေ အထပ်ထပ်ကပ် နေသူများကိုအံသြခြင်းနှင့် ရွှေတုံးရွှေခဲဖြစ်နေသော ရှေးဟောင်းရုပ်ပွားတော် အနုလက်ရာကို အံ့ချီးဘနမ်းဖြစ်ခြင်းကြောင့်ဖြစ်ပါသည်။ သည်ကဲ့သို့ဆိုလျှင် မိုးကုတ် ဖောင်တော်ဦးဘုရားပေါ်က ရတနာပလ္လင်နှစ်ဆူသည် နိုင်ငံခြားသားခရီးသွားတို့အား  ဂုဏ်ယူဝင့်ကြွားပြသစရာ နေရာတစ်ခုဖြစ်လာနိုင်မည်မှာလည်း အသေအချာပင်ဖြစ်ပါသည်။

ဒေသနှင့်သဘာဝအလှများအပြင်  နှလုံးအလှများကိုလည်း ပြောပြလိုသေးသည်။ ရှေးမိုးကုတ်ကျောက်တွင်း များတွင် နေ၀င်မိုးချုပ်လို့ တွင်းဆေးမပြီးသေးပါက (ကျောက်ရွေးမပြီးသေးပါက) သဲဖတ်ပုံကို သစ်ခက်ငယ်တစ်ခု ထိုးထားတတ်ကြသည်ဟုဆိုသည်။ ဒါက ကျောက်ဆက်ရွေးရန်ရှိ သေးသော သင်္ကေတ။ ဒါဆို ဘယ်သူကမျှ သည်သဲဖတ်ပုံ ၀င်မနှိုက် တတ်ကြသည့်အပြင် ကျောက်ပေါ်နေလျှင်တောင် သဲဖတ်ပုံထဲပြန် ထိုးထည့်သွား တတ်ကြသေးသည်တဲ့။ မိုးတွေရွာလို့ ဗြုံးမြေပုံပေါ်ကျောက်ပေါ်နေလျှင်လည်း အသာထိုးမြှုပ်ပြီး ပိုင်ရှင်ကို အပြေးအကြောင်းကြားရတာလည်း ချစ်စရာဖြစ်သည်။

နောက် တွင်းဆေးလျှင် ကျောက်ကုန်သည်က တွင်းဆေးရပ်ကွက်ထဲ လာသည်။ လမ်းပေါ်ကနေ “ဘယ်သူဘယ်ဝါရေ ဘာရထားပြီးလဲ” အော်မေးတတ်သည်။ တွင်းသားများကရထားသော ကျောက်ထုပ်ကို တွင်းတဲသက်ကယ်မိုးတွင် ထိုးထားလေ့ရှိတတ်သဖြင့် ယူကြည့်သွားရန် ဗြုံးဆေးခွက်ထဲက ပြန်အော်တတ် ကြသည်။ သည်မှာကုန်သည်က ကျောက်ထုပ်ယူကြည့် ရွေးဆယ်ပြီး ဈေးပေးတတ်ကြသည်။ ဈေးတည့်လျှင် ငွေချေ ယူသွား မတည့်လျှင် သက်ကယ်မိုးကြား ပြန်ထားခဲ့။ ဘယ်သူကမျှ မတိုမလျှိုကြပါ။ သိပ်ရိုးစင်းသည့် စရိုက်လက္ခဏါများဖြစ်သည်။

ဧည့်သည်လာလျှင် စိမ်းစိမ်းကျက်ကျက် အပြေးအလွှားထမင်းစားခေါ်သည်။ မစားလျှင်စိတ်ဆိုးသည်။ အိမ်လာလည်လျှင် ရေနွေးကြမ်း(လက်ဘက်ရည်)က ဗန်းနှင့်အသင့်။ အိမ်တိုင်းမှာ အပိုဆောင်ထားတာက အိပ်ယာ၊ စောင်၊ ခြင်ထောင်။ ဧည့်သည်ပြန်လျှင် “ဖြေးဖြေးနော်” လို့နှုတ်ဆက်တာကဓလေ့။ လက်ဖက်၊ မက်ခေါက်၊ မက်မန်းတွေကလက်ဆောင်။ အမေမာ ကျွန်တော်တို့ဆိုလျှင် ဖွားဖွားမာခေါ်ရမည့် လူထုဒေါ်အမာ၏ အမေ့ရှေးစကား စာစုတွေထဲ သည်ဖြေးဖြေးနော်ကို ချီးကျူးရေးသားထားတာ တွေ့လိုက်တော့ ကျွန်တော်မိုးကုတ်သား ပီတိဖြာရသည်။ သည်စိတ်ရင်းလေးတွေက အခုအချိန်မှာဆို ဆင်ပိန်လျှင်ကျွဲလောက်တော့ ကျန်သေးသမို့ ခရီးသွားတို့အတွက် စိတ်နွေးစရာ အနေအထားဆိုလည်း မမှားနိုင်သော အရပ်ဖြစ်သည်။

ဒါတွေအပြင် မိုးကုတ်သားတို့၏ ကျောက်ထွက်သော ဗြုံးမြေကြောရောက်အောင် မျောတိုင်၊ ၀ါး၊ သစ်ခက် (မိုးကုတ်အခေါ်မြက်)တွေသုံးပြီး လေးပင်တွင်းနှင့် ဖောက်ဆင်းကာ မြေအောက်က ဗြုံးကြောကို လှိုဏ်ဖောက် လှိုက်စားတတ်သော မိရိုးဖလာ အင်ဂျင်နီယာ အတတ်ကလည်း အံ့မခန်းစရာ။ ဒါတွေက ခရီးသွား တွေအလယ်မှာ မူရင်းအရှိအတိုင်း ပြသလို့ရသည်။ သည်လိုမိုးကုတ် image တွေကို ထိုင်းနိုင်ငံ ပတ္တယားရှိ ကျောက်မျက် ကုန်တိုက်ကြီးတစ်ခုတွင် လူလုပ်အရုပ်များဖြင့် ၄င်းတို့ရင်းမြစ်များ ယောင်ယောင် ပြသထားကြောင်းသိရသည်။

ဤကဲ့သို့သော မိုးကုတ်သည် အဘယ့်အတွက်ကြောင့် ရွက်အုပ်သီးအဖြစ်နှင့်နေရပါသနည်း။ ဘာကြောင့် ကမ္ဘာ့ခရီးသွားစာမျက်နှာပေါ် တက်မပြနိုင်ရရှာပါသနည်း။ လုံခြုံရေးအတွက်လား။ လာရောက်သော နိုင်ငံခြားသား တို့ကို ကျောက်မျက်ခိုးထုတ်ရောင်းချမှာ စိုးကြသည့်အတွက်လား။ ထိုင်းနိုင်ငံသည် ကျွန်တော်တို့မိုးကုတ်မှ ရတနာ နှင့် နိုင်ငံတစ်ကာသို့ ပွဲထုတ်ခဲ့တာ ရာစုချီနေပါပြီ။

ဝမ်းနည်းစရာကောင်းသည့်တစ်ချက်မှာ ကျွန်တော်တို့မိုးကုတ်သားရတနာကုန်သည်များ နိုင်ငံတကာ ကျောက်မျက်ရတနာဈေးကွက်သို့ သွားရောက်လေ့လာသောအခါ ကျောက်မျက်ရတနာဆိုသည်မှာ ထိုင်းခေါ် ယိုးဒယားမှသာထွက်သည်ဟု ကြားသိလာရခြင်းဖြစ်သည်။ ဒါ့ကြောင့် ကျွန်တော်တို့လည်း တံခါးဖွင့်ဝါဒကျင့်သုံး မည့် ဒီမိုကရေစီနိုင်ငံတော်သစ်တွင် သည်ဈေးကွက်ကို ပင်ရင်းမိုးကုတ်သို့ ရွေ့ကြည့်ဖို့တာဝန်ရှိပါပြီ။

မိုးကုတ်တွင် ထိုင်းမှာကဲ့သို့ ခုံတစ်လုံးချ၍ ထိုင်ဝယ်ရနိုင်သော Gem Market ကျောက်မျက်ဈေးတစ်ခု တည်ဆောက်ကြည့်သင့်ပါပြီ။ ထိုဈေးတွင် One Stop Service တွေထားကာ ရောင်းချကြသောရတနာကို ချက်ချင်းအခွန်ဖြတ်၍ ၀ယ်သွားလိုသူတွေ လွတ်လပ်စွာ သယ်ဆောင်သွားနိုင်ရန် စီစဉ်ပေးလိုက်လျှင် မည်သူမျှ အပင်ပန်းခံ ထောင်လက်တစ်ကမ်းလှမ်းမှ ခိုးထုတ်နေကြမည်မဟုတ်ပါ။ ကွန်ချက်ကိုအမည်ဝှက်ခံနေရသော ဘ၀မှ လွတ်ကာ နိုင်ငံတကာဈေးကွက်သို့လည်း မားမားမတ်မတ်တက်နိုင်မည်ဖြစ်ပါသည်။ သယံဇာတယိုဖိတ်မှုကို တားနိုင်မည့်အချက်ဟု ဆိုချင်ပါသည်။ ရှေးယခင်ခေတ်များက ဘုံဘေကုလား ကုန်သည်များသည်  မိုးကုတ်ရတနာ ကုန်သည်တို့၏ ကော်ဇောပေါ်ဝယ် တရိုတသေ၀ယ်ခဲ့ဖူးရသည်ကို သတိတရ ရှိသင့်ပါသည်။ မိုးကုတ်ရတနာ ဈေးကွက် တစ်ခေတ်ဆန်းစေရန် တာဝန်ရှိသူများ စဉ်းစားသင့်ပါပြီ။

ထို့အတူ သည်ဒေသမှာ ပြည်တွင်း/ပြည်ပ ခရီးသွားလုပ်ငန်းတစ်ခု ဖွံဖြိုးလာလျှင် ဒေသခံတို့အတွက် သယ်ယူပို့ဆောင်ရေး၊ စားသောက်တည်းခိုရေးများအပြင် ဒေသထွက်အမှတ်တရပစ္စည်းလုပ်ငန်များတွင် အချိုး ညီမျှစွာ အလုပ်အကိုင်အခွင့်အလမ်းတွေ ရလာနိုင်မှာဖြစ်သည်။ အရာရာကို အလေးအနက်ထား၍ မြန်မာ့ရေမြေ စိတ်ရင်းနှင့်ကိုက်အောင် အသွင်ပြောင်းပေးနေသော သမ္မတကြီးဦးဆောင်သည့် နိုင်ငံတော်တွင် နိုင်ငံခြားဝင်ငွေ စီးဝင်လာမည့်လမ်းတရပ်ကို လက်လွှတ်မခံသင့်ဟု တိုက်တွန်းလိုပါသည်။ ဒါကပတ္တမြားဆန်ကျိုး အဖိုးပြည်တန် တွေထွက်သော မြန်မာ့ရတနာမြေကို ကမ္ဘာကသိစေရန် ထားရှိသင့်သော ဇာတိမာန်အဖြစ်လည်း ဆိုချင်ပါသည်။

ကျွန်တော်တို့နိုင်ငံမှ ပုဂံဒေသသည် နိုင်ငံခြားသားတို့၏ Favorite နေရာဖြစ်သောအခါ ဒေသခံများ အနေဖြင့် ဒေါင့်အမျိုးမျိုမှ အလုပ်အကိုင်တွေ ရလာကြသည်မှာ မြင်သာနေပါသည်။ ကျွန်တော်တို့မြို့လေး လည်း ခရီးသွားမြိုတော်အဖြစ်ရပ်တည်နိုင်လျှင် ပညာတတ်သူများလည်း ပညာတတ်သူများအလိုက် အလုပ် အကိုင်ရကာ ကျန်သူများလည်း မိမိတို့ တတ်ကျွမ်းရာအလိုက် အလုပ်အကိုင်အခွင့်အလမ်းများ ရလာပါက ရတနာကိုမျှော်ပြီးကြီးရသော လူမှုလူတန်းစားဘ၀မှလည်း ဖြန့်ထွက်လာနိုင်တော့မည်ဖြစ်ပါသည်။ သဘာဝ ပတ်ဝန်းကျင်နှင့် နိုင်ငံသယံဇာတကို ကြီးကြီးမားမားမထိခိုက်ဘဲ အပေါ်ယံကိုသာ ပြစားရသည့် ခရီးသွားစီးပွား ရေးလုပ်ငန်းကို ထိန်းသိမ်းလုပ်ကိုင်နိုင်လျှင် ကျွန်တော်တို့ဒေသအတွက် အသက်ရှုချောင်စရာ ဖောက်ထွက် လမ်းတစ်ခုဟုလည်းဆိုချင်ပါသည်။

များမကြာမှီတွင်လည်းမြန်မာနိုင်ငံတော်သည် အာဆီယံရင်ပြင်တွင် ဥက္ကဋ္ဌနေရာဖြင့် ဂုဏ်ယူဝင့်ထယ်စွာ ခြေချတော့မည်။ လာမည့်ဆီးဂိမ်းကစလို့ ဧည့်သည်ကို ပျူပျူငှာငှာကြိုဆိုကာ ဟိုဟိုသည်သည် အလည်ပို့ပေး သော အိမ်ရှင်နိုင်ငံလေးဖြစ်ရပါမည်။ အမေရီကန်အခြေစိုက် CNN ရုပ်သံသတင်းဌာနက မြန်မာနိုင်ငံကို ၂၀၁၂ခုနှစ်အတွက် ကမ္ဘာလှည့် ခရီးသွားများ သွားလာလည်ပတ်ရန် အကောင်းဆုံနေရာကိုးခုတွင် နံပါတ်သုံး အဆင့် ထည့်သွင်းသတ်မှတ်ကြောင်း သတင်းများအဆုံးဝယ် မိုးကုတ်ဆိုတာလည်း ခေါင်းပြူထုတ်ရတော့မည့် ကာလဖြစ်ပါသည်။ ဆရာဦးလှဝင်း(လေသူရဲတစ်ဦး)ကလည်း True News ဂျာနယ်တွင် နှစ်တရာကျော်က အဆောက်အုံများ ဆောင်ပါးဖြင့် မိုးကုတ်၏သမိုင်းဝင်များကိုရေးနေပြီ။ ဆရာက “တစ်နေ့ မြန်မာနိုင်ငံ လုံးဝတံခါးဖွင့်ဝါဒ ကျင့်သုံးတဲ့ခေတ်အခါ ရောက်တဲ့အချိန်မှာ နှစ်စဉ်လူအများ ဆုံးလာရောက်လည်ပတ်မယ့် မြို့ဟာ မိုးကုတ်ပါပဲ” အဆိုပြုထားသည်။ ကျွန်တော်လည်း ကျွန်တော်တို့မြို့လေးကို မိုးကုတ်သည် ခရီးသွားမြို့လေးဖြစ်သင့်သည် ဟုဆရာနှင့်ထပ်တူ ဆန္ဒပြုလိုက်ရပါသည်။ ချစ်သောမိုးကုတ်ရေ အမောတွေ ပြေပါတော့နော်။

                                                                                      ပေးပို့သူ

ပြတ်သား(ရတနာမြေ)

(17.1.2012)